Jules Sentore
Jules Sentore

Jules Sentore



My Biography

Icyoyitungiye Jules Bonheur wamenyekanye ku izina ry’ubuhanzi rya Jules Sentore yavutse tariki ya 10 Ukwakira 1989, avukira mu gihugu cy' u Burundi mu mujyi wa Bujumbura ubu akaba afite Mama we naho papa we yatabarutse Jules ataravuka, akaba afite mushiki we nk’umuvandimwe rukumbi afite.

Amashuri abanza yayize muri Ecole Primaire de Kacyiru, ayisumbuye ayiga i Nyanza muri Igihozo St Peter (Tronc Commun), akomereza muri Solidality Academy i Gikondo. Yize HEG (Histoire Economy and Geography). Ku bijyanye n’amashuri makuru, yifuza kuzakomereza mu bijyanye na muzika.

Kuva Jules yavuka yarezwe na sekuru  Sentore Athanase uzwi cyane muri muzika gakondo nyarwanda. Akibyiruka yahise atangira kwiga ibijyanye n’ubutore, dore ko kuva mu myaka 5 gusa yatangiye kwiga guhamiriza, gutemba n’ibindi, akomeza kubikora kugeza mu myaka 15 ubwo yatangiraga kwiga gucuranga inanga no kuvuza ingoma nyarwanda, gusa kuririmba byo byari byaramwihishe kuburyo byamugoraga maze sekuru  Sentore akamubwira ko ibyiza yaba abiretse kuko abona ko bikomeje kumugora, ariko akamwizeza ko bizaza kuko yabonaga azavamo umuhanzi.

Jules yaje kubikunda cyane atangira kwigana indirimbo z’abandi bahanzi harimo Kidumu, Muyango, Cecile Kayirebwa n’abandi bo hanze harimo nka Lionel Richie, Kenny Rogers n’abandi benshi, nyuma yaje kumva biri kuza cyane maze sekuru Sentore Athanase atangira kubimufashamo amwereka ubuhanga yakoresha ngo ijwi rye rirusheho kumworohera ndetse yiharire ubuhanga bwe bwite, gusa yari yariyemeje kuririmba bya kizungu nyuma abitekerezaho asanga yaribeshye ahita atangira kubivamo, atangira kwihata iby’umuco nyarwanda, yumva yiyemeje kuba muri GAKONDO nk’uko sekuru yafatiragaho urugero yabimutozaga.

Indirimbo ye ya mbere yaririmbye akayishyira ku mugaragaro yitwa Umugambi Wayo, yayikorewe na Producer Pastor P. Yayikoze mu rwego rwo gusobanura uburyo yavutse akanakuramo kuko abibonamo nk’igitangaza cy’Imana.

Ubu amaze gukora album yitwa MURAHO NEZA igizwe n’indirimbo 11, akaba afite n’izindi nyishi yagiye akorana n’abahanzi batandukanye, gusa yemeza ko akunda gukora indirimbo nkeya ariko yitondeye ari nabyo bituma adashyira ahagaragara indirimbo nyinshi mu gihe gito.






©2018 Inyarwanda
An Inyarwanda Ltd Venture